Ўзбекистонда пахта йиғим-терими қизғин паллага кирган шу кунларда Қашқадарёнинг Миришкор туманида «Меҳнат роҳат» палаткали шаҳарчаси барпо этилди. Бу ҳақда ЎзА хабар берган.

Умумий майдони 2,4 гектар бўлган ушбу масканда теримчилар учун барча қулайликлар яратилган.

«Сўнгги типдаги бу палаткалар халқаро тажрибалар асосида қурилган. Ёмғир ўтказмайди, иссиқ-совуққа чидамли. Уларда теримчиларнинг дам олиши учун барча қулайликлар мавжуд», — дейилган ЎзА хабарида.

Шаҳарча ҳудудидаги ошхона, тиббиёт пункти, савдо дўкони, гўзаллик салони ва бошқа қўшимча хизматлардан аҳоли мамнунлиги таъкидлаб ўтилган.

Шунингдек, ҳудудда теримчиларнинг маданий ҳордиқ чиқариши учун концерт дастурлари намойиш этиладиган махсус майдон барпо этилган.

Ўзбекистонда пахта йиғим-терими қизғин паллага кирган шу кунларда қашқадарёлик деҳқонлар 412 минг тонналик хирмон яратиш учун астойдил меҳнат қилмоқда. Жорий йилда вилоятдаги 7 минг 309 фермер хўжалиги томонидан 157 минг 200 гектар майдонда гўза парваришланди. Агротехник тадбирлар ўз вақтида бажарилгани, таъминотчи корхоналар минерал ўғит ва ёнилғини ўз вақтида етказиб бергани самарасида мўл ҳосил етиштирилган. 

 «Бу йил 30 гектар майдонда ғўзанинг “Бухоро-102” навини парваришладик. Ўғит ва техника учун ёнилғи даланинг бошигача келтириб берилди, сув билан ўз вақтида таъминланди. Ҳозир ҳар бир ғўзада камида 16-17 донадан кўсак бор. Бу мўл ҳосилдан дарак», — дейди Қарши туманидаги “Шукрона замин” фермер хўжалиги раҳбари Ҳотам Жумаев.