Миср соҳиллари яқинида ноқонуний муҳожирлар кемасининг фалокатга учраши оқибатида ҳалок бўлганлар сони 51 кишига етди. Бу ҳақда Мисрнинг Bawaba News нашри хабар бермоқда. 

Муҳожирлар билан тўлиб-тошган қайиқ 21 сентябрда Мисрнинг Рашид шаҳри яқинида Ўрта Ер денгизида чўкиб кетган. Дастлаб қайиқда Судан, Сурия, Сомали, Эритрея ва Мисрдан 300 га яқин одам бўлгани маълум қилинган. 

Миср ҳарбий-денгиз кучлари маҳаллий балиқчилар кўмагида айни вақтда сувдан 160 дан кўпроқ одамни қутқариб олди, юзга яқин одам бедарак йўқолган. Бу орада баъзи маълумотларга кўра, қайиқда 600 га яқин одам бўлгани, тақдири номаълум бўлиб қолаётганлари сони эса 200 дан ортиши мумкинлиги айтилмоқда.

Аввалроқ Миср бош прокуратураси чўкиб кетган қайиқ жамоасининг 4 аъзосини ҳибсга олишга буйруқ берган, яна 9 гумонланувчи қидирувга берилган. Омон қолганларнинг айтишича, одамларни Европага ноқонуний жўнатиш билан шуғулланган кимсалар бир неча кун давомида турли ҳудудлардан муҳожирларни соҳилга олиб келган. Муҳожирлардан ҳар бири уларнинг бу хизмати учун 2 минг долларга яқин ҳақ тўлаган. Сўнгра муҳожирларни қайиққа ўтказиб Италия томон жўнатишган, бироқ қайиқ ҳаддан зиёд юклангани сабаб чўкиб кетган.