25 сентябрь куни Хитойнинг Гуйчжоу вилоятида дунёдаги энг катта радиотелескоп фойдаланишга топширилди. Бу ҳақда ShanghaiDaily.com хабар берди.

FAST (Five hundred meter Aperture Spherical Telescope) номини олган бу телескоп қурилиши 2011 йилда бошланган эди. Унинг очилиш маросимига юзлаб кишилар ташриф буюришди.

Қурилманинг диаметри 500 метрни ташкил этади, у 4,450 мингта учбурчак қайтаргичга эга. У ўзининг тузилиши бўйича қурилмани ўрнатиш учун табиий чуқурликдан фойдаланилган Аресибо обсерваториясига ўхшайди. Унинг қурилишига 1,2 миллиард юань сарфланди (180 миллион доллар). Бу телескоп яна 15-20 йил мобайнида жаҳондаги энг йирик телескоп мақомини ўзида сақлаб қолиши кутилмоқда.

30та футбол стадионига тенг ҳажмдаги бу телескопнинг мақсади - бошқа сайёраларда ҳаётнинг бор йўқлигини астрономик ҳисоб-китоб қилиш ва мавҳум материяни ўрганиш ҳисобланади. Янги телескоп Хитойнинг очиқ коинотдаги тадқиқотлар борасидаги имкониятларини оширишга ёрдам бериши кўзда тутилган. Унинг ёрдамида Ердан 11 миллиард ёруғлик йили масофасида жойлашган космик жисмларни кузата олиш мумкин бўлади.

2016 йилнинг бошида провинция ҳукумати телескоп қурилаётган ҳудудда яшовчи 9 мингга яқин кишини компенсация тўлаш шарти билан бошқа жойга кўчирган эди.