Сан-Себастьянда (Испания, басклар мамлакати автоном вилояти) 64-халқаро кинофестиваль ғолиблари тақдирланди. Бош мукофот хитойлик режиссёр Фэн Сяоганнинг «Мен мадам Бовари эмасман» фильми  учун «Олтин чиғаноқ» мукофоти топширилди. Бу ҳақда Variety хабар тарқатган.

«Кумуш чиғаноқ» эса ушбу фильмда бош қаҳрамонни ижро этган актриса Фань Бинбинга "энг яхши аёл роли" учун берилди. 

"Энг яхши эркак роли" учун мукофот эса Франсиско Паэснинг «Минг юзли эркак» фильмида бош қаҳрамонни ижро этган Эдуард Фернандесга топширилди.

Жанубий кореялик режиссёр Хон Сан Су эса «Сен ва сеникилар» фильми учун тақдирланди. 

Испаниядаги кинофестивалда Родриго Сорогойену ва Исабель Пенье «Бизни худо кечирсин» фильми сценарийси учун энг яхши сценарийнавислар сифатида мукофотланди.

Ҳакамларнинг махсус мукофоти икки картина учун берилди — «Қиш» ва «Гигант».

Сан-Себастьяндаги халқаро кинофестиваль 1953 йилдан бери ўтказиб келинади ва Европадаги энг нуфузли анжуманлардан бири ҳисобланади (Канн, Берлин ва Венеция кинофестиваллари қаторида).