Европа парламентининг фуқаролар эркинлиги, адлия ва ички ишлар қўмитаси Украинага ЕИ билан визасиз режими берилишини қўллаб-қувватлади. Бу ҳақида ТАСС агентлиги хабар берди. 

Қисқа муддатли визаларнинг бекор қилиниши учун 39 нафар депутат овоз берди, 4 нафари эса бунга қарши чиқди. Энди бу масала жорий йилнинг октябрида Страсбургда бўлиб ўтадиган Европарламентнинг келгуси сессиясида овозга қўйилади. 

2016 йилнинг июлида Еврокомиссия Украинадаги муваффақиятли ислоҳотлар ҳақида маълум қилди ва визасиз режим октябрь ойида йўлга қўйилишини тахмин қилди. Европа комиссиясининг қўшничилик сиёсати масалалари билан шуғулланувчи Йоханнес Хан ҳам худди шундай прогноз қилди. "Умид қиламанки, бу қарор октябрда ўз тасдиғини топади", - деди у. У Евроиттифоқ Киевни сиёсий ва молиявий жиҳатдан қўллаб-қувватлашда давом этишини маълум қилди. 

ЕИ билан визасиз режимни либераллаштириш Киев ҳукумати ташқи сиёсатининг мақсадларидан бири ҳисобланади.