Европа терма жамоаси хоккей бўйича Жаҳон кубоги ярим финалида Швеция терма жамоасини мағлуб этди. 

25 сентябрь куни Торонтода бўлиб ўтган учрашув 3:2 ҳисобида европаликлар фойдасига ҳал бўлди. 

Жамоалар биринчи даврада ҳисобни очишнинг уддасидан чиқа олишмади. Бироқ, шиддатли бошланган иккинчи давранинг учинчи дақиқасида шведлар ҳужумчиси Никлас Бэкстрем жамоасини олдинга олиб чиқди. Европаликлар орадан 14 дақиқа ўтгач, жавоб шайбасини киритишнинг уддасидан чиқди. 

Дуранг натижа билан бошланган учинчи даврада Европа термаси словакиялик Томаш Татарнинг саъй-ҳаракатлари билан олдинга чиқиб олди. Ўйиннинг асосий вақти якунланишига 4 дақиқа қолганида швецияликлар вакили Эрик Карлссон ҳисобни тенглаштириб, ўз жамоасида умид учқунларини уйғотди. 

Европаликларнинг ғалабасини дубль қайд этишга муваффақ бўлган Татар таъминлади. У, қўшимча вақтнинг 3 дақиқасида рақиб дарвозасини ишғол қилди. 

Шундай қилиб, Жаҳон кубоги финалида Европа терма жамоаси канадаликларга қарши муз майдонига чиқади. Турнир ғолиби иккита финал баҳси натижасига кўра аниқланади. Биринчи учрашув 28 сентябрда бўлиб ўтади.