АҚШ президенти лавозимига номзодлар Хиллари Клинтон ва Дональд Трамп 26 сентябрда Нью-Йоркдан 40 км узоқликда жойлашган Хэмпстед шаҳридаги Хофстр университетида биринчи марта теледебатларда юзма-юз учрашади.

Президентлик теледебатларини ўтказиш комиссияси қарори бўйича, дебатлар ҳар бири 15 дақиқадан 6 қисмга бўлинади. Ҳар бир қисмдаги саволлар мавзусини дебатлар модератори – NBC телекомпаниясининг кечки янгиликлар дастури бошловчиси Лестер Холт танлайди. Клинтон ва Трампда жавоб учун 2 дақиқадан вақт берилади, сўнгра рақибининг сўзларига жавоб бериш имконияти бўлади. АҚШ президенти лавозимига номзодларнинг биринчи учрашуви маҳаллий вақт билан 21:00 да бошланади.

Дебатларда биринчи савол Клинтонга берилади. Ўрнатилган қоидаларга кўра, теледебатларда охирги 5 та умуммиллий сўровномада камида 15 фоиз сайловчиларнинг овозини олган номзодлар иштирок эта олади. Трамп ҳам, Клинтон ҳам бу шартга тўғри келади: охирги сўровномаларга кўра Клинтонни 45-48 фоиз, Трампни 39-44 фоиз сайловчилар қўллаб-қувватлаган. Либертариан партияси номзоди Гэри Жонсон ва "яшиллар" номзоди Жилл Стейн дебатларга қўйилмайдилар, чунки улар тўплаган овозлар мос равишда 10 ва 4 фоизни ташкил қилмоқда.