Грузиянинг ҳукмрон "Грузия орзуси" партияси ижрочи котиби Ираклий Кобахидзенинг сўзларига кўра, собиқ президент Михаил Саакашвилининг "Ягона миллий ҳаракат" мухолифат партияси 8 октябрда бўлиб ўтиши белгиланган парламент сайловлари олдидан мамлакатдаги вазиятни издан чиқариши учун етарли имкониятларга эга эмас. 

"Ягона миллий ҳаракат" партиясини қўллаб-қувватлаган "Эркин ҳудуд" ёшлар ташкилотининг бир неча аъзолари ташкилот сафини тарк этишган. Уларнинг таъкидлашича, ташкилот Саакашвилидан мамлакатда давлат тўнтариши ўтказиш бўйича кўрсатма олган. Хусусан, собиқ-президент парламент сайловларидан кейин, сайлов натижалари қалбакилаштирилганини иддао этиб, намойишлар ўтказиш борасида буйруқ берган. 

""Ягона миллий ҳаракат" идораларида Грузиядаги вазиятни беқарорлаштириш бўйича аниқ режа ишлаб чиқилмоқда, бунинг учун гуруҳлар ва қўшимча ташкилотлар тузилаяпти", — дея Кобахидзе сўзларини келтиради партия матбуот хизмати.

Унинг сўзларига кўра, ҳукумат вакиллари сайловлар арафасида мамлакатда турли хил фитналар содир этилиши мумкинлиги хусусида бир неча бор сўз юритган. 

Грузия парламент сайловида ҳукмрон "Грузия орзуси" ва йирик мухолиф партия "Ягона миллий ҳаракат" ўзаро сиёсий рақиблар ҳисобланади.