Ўзбекистон Президентининг 2016 йил 19 сентябрдаги қарорига мувофиқ Абу Райҳон Беруний номидаги Тошкент давлат техника университети қошида ўзбек-япон ёшлар инновация маркази ташкил этилади. Мазкур қарор матни билан Lex.uz сайтида танишиш мумкин.

Марказни ташкил этишдан мақсад, ёш олимлар ва талабаларнинг илмий тадқиқотларини жаҳон амалиёти ва халқаро меъёрларга мос равишда замонавий, илғор усул ва технологиялар воситада ўтказишларига шароит яратиш, шунингдек, япон олимлари ва етакчи мутахассислари иштирокида мамлакат иқтисодиётининг асосий соҳалари учун юқори малакали кадрларни тайёрлашдан иборатдир. 

Қайд этиш жоизки, Ўзбекистон ва Япония ҳукуматлари 2015 йил 25 октябрида инновациялар марказини ташкил этишда ҳамкорлик қилиш меморандумини имзолаган эди. Шунга кўра, марказни ташкил этишда Цукуба, Нагоя, Кейо университетлари, Тойохаши Технология университети ва Токио технология институти иштирок этади. 

Марказнинг асосий вазифаларидан бири ёш олим ва талабаларнинг илмий кашфиётлари ва техник ғояларини ишлаб чиқариш намуналари, қурилма, технологик жараён ва ечимларга айлантиришдир. 

Бундан ташқари, марказда юқори электр энергияси тежамкорлигига эга, атроф-муҳитга салбий таъсири камроқ бўлган юқори технологияли ишлаб чиқариш қувватларини яратиш устида иш олиб борилади. 

Шунингдек, унда маҳаллий ва хорижий ташкилотлар, илмий-таълим доиралари буюртмалари асосида қўшма илмий ва амалий тажрибалар ҳам ўтказилади. 

Марказ ходимлар сони 27 кишини, шу жумладан 4 нафар япониялик мутахассисдан иборат бўлади.