Англия футбол ассоциацияси (FA) Англия терма жамоаси бош мураббийи Сэм Эллардайснинг коррупцияга алоқадорлиги бўйича хабарлар чиққач, бу борада текширувлар бошлаган. Бу ҳақда Sky Sports хабар тарқатди.

Бундан олдинроқ, The Telegraph нашри мустақил журналистик текширув орқали Эллардайснинг коррупцияга алоқадорлиги ҳақида хабар тарқатганди.

Журналистларнинг вакиллари Эллардайс билан 2 марта учрашишган ва улар хитойлик бизнесменларнинг вакиллари сифатида унга АПЛдаги трансферларда иштирок этиш орқали пул таклиф этишган. 61 ёшли мутахассис 400 минг фунт эвазига трансферлар бўйича музокараларга таъсир кўрсатиши мумкинлигини билдирган.

Бундан ташқари, Эллардайс Англия футбол ассоциацияси (FA)нинг ўйинчилар трансферидан учинчи шахсларга футболчининг ҳуқуқига эга бўлишни тақиқловчи қоидаларни четлаб ўтиш йўллари ҳақида сўзлаб берган.

FA The Telegraph журналистларидан бу иш бўйича барча материалларни тақдим этишни сўраган.