National Geographic канали сайёрамиздаги экологик муаммолар ҳақидаги "Тўфонга қадар" деб номланган ҳужжатли фильм трейлерини тақдим қилди. Фильмда машҳур актёр, "Оскар" мукофоти совриндори Леонардо Ди Каприо суратга тушган. 

Мазкур ҳужжатли фильм иқлимнинг ўзгариши ва атроф-муҳитнинг ифлосланиши натижасида рўй бериши мумкин бўлган глобал фалокат тўғрисида сўзлайди. 

"Мен шунчаки қанчалик чуқурлашганимизни ва буни тўхтатишнинг бирор бир иложи бор ёки йўқлигини билмоқчиман", - дейди Ди Каприо. 

Картинага Фишер Стивенс режиссёрлик қилган. Фильм съёмкаларида Рим Папаси Франциск, АҚШ президенти Барак Обама, БМТ бош котиби Пан Ги Мун, шунингдек SpaceX ҳамда Tesla компаниялари раҳбари Илон Маск иштирок этган. "Тўфонга қадар" ҳужжатли фильмининг жаҳон премьераси 30 октябрда бўлиб ўтади.