Халқаро тергов гуруҳи Малайзия авиалиниясининг MH17 рейсини амалга ошираётган Boeing самолёти ҳалокатига доир маълумотларни тўлиқ ошкор қилмади. Нидерландия бош прокурори Фред Вестербекенинг маълум қилишича,  тергов жараёнини узиб қўймаслик учун шундай йўл тутилган. 

2014 йилда рўй берган авиаҳалокат айбдорларини изловчи Ҳамкорликдаги тергов гуруҳи (Joint Investigation Team, JIT) чоршанба куни дастлабки ҳисоботини берди. 

"Биз ҳамма нарсани ҳам ошкор қила олмаймиз, чунки бу ҳали давом этаётган тергов жараёнини узиб қўйиши мумкин", - деди Вестербеке ҳисобот тақдимотида. 

МН17 рейси билан Амстердамдан Куала-Лумпурга парвоз қилаётган Малайзия авиалинияларига қарашли Boeing 777 самолёти 2014 йилнинг 17 июлида Донецк вилояти ҳудудида ҳалокатга учраган. Самолёт бортидаги 298 нафар йўловчи ҳалок бўлган. 

РФ президентининг матбуот котиби Дмитрий Песков Россия MH17 авиаҳалокати бўйича кенг қамровли маълумот берганини таъкидлади. У барча давлатлар ҳам бундай қамровли маълумот бермаганини афсус билан қайд этди. Унинг сўзларига кўра, "баъзи мамлакатлар ҳануз радар маълумотларини тақдим этишмаган".

Шунингдек, Песков Москва Голландиянинг MH17 рейси ҳалокати бўйича олиб борган тергов иши натижаларини баҳолашини маълум қилган. У "ҳарбийлар томонидан тақдим этилган сўнгги радар маълумотларини инобатга олган ҳолда хулоса қилиш зарурлигини таъкидлади".