Ўзбекистон пойтахтида фаолият юритувчи тўртта йирик тиббиёт-даволаш муассасаси қайта ташкил этилади, хусусан Республика миқёсидаги тиббий марказлардан бири тугатилади. 

Мазкур чоралар Вазирлар Маҳкамасининг «Ўзбекистон Республикаси соғлиқни сақлаш тизими тиббиёт ходимлари меҳнатига ҳақ тўлаш тизимини такомиллаштириш ва тиббиёт ташкилотлари тузилмалари фаолиятини янада яхшилаш чоралари тўғрисида»ги қарорида кўзда тутилган. 

Унга мувофиқ, қандли диабет касаллиги асоратларига қарши Республика жарроҳлик маркази тугатилиб, у 2-сонли Тошкент Тиббиёт академияси таркибига киритилади. Аммо, мазкур бирлашув беморларга хизмат кўрсатиш сифатига салбий кўрсатмаслиги қайд этилган. Тугатилаётган марказ жамоаси ўз биносида аввалгидек беморларга хизмат кўрсатади, фақатгина ҳужжатлар тўлдириш жараёнига ўзгартириш киритилади. 

Тошкент шаҳри Олмазор туманидаги талабалар поликлиникаси Олмазор тумани Талабалар шаҳарчасининг Марказий кўптармоқли поликлиникасига айлантирилади ҳамда нафақат талабалар, балки мазкур ҳудудда истиқомат қилувчи аҳолининг бошқа қатламларига ҳам тиббий хизмат кўрсатади. 

Айни вақтда, Тошкент 2-сонли шаҳар клиник шифохонаси ва 2-сонли шаҳар сил касалликларига қарши шифохонаси тугатилади. Уларнинг ҳисобидан бўшаётган беморлар ётоқ ўрни пойтахтдаги бошқа тиббиёт муассасаларига берилади. Пойтахт шифо масканларини йириклаштириш аҳолига сифатли хизмат кўрсатишни кучайтиришга сабаб бўлади.