Ливия давлат жамғармаси (LIA) дунёнинг энг йирик банкларидан бири бўлган Goldman Sachs билан ҳамкорликдан 1,2 млрд доллар зиён кўрди, деб хабар бермоқда Bloomberg ахборот агентлиги. 

Маълум қилинишича, Ливия Goldman Sachs’ни Муаммар Каддафий амалдорларини сотиб олишда, LIA’га зиён келтирувчи қимматбаҳо қоғозларни сотиш ва жамғарма раҳбарлари тажрибасизлигини ўз мақсадларида қўллашда айбламоқда. 

Агентлик маълумотларига кўра, Goldman Sachs’нинг собиқ ходими Юсеф Каббаж профессионал ахлоқ меъёрларини қасддан бузган ва LIA вакилларини аввалдан барбод бўлишга маҳкум бўлган молиявий операцияларга боришга кўндириш мақсадида ёлғон маълумотлар берган, бу эса 2008 йилда жамғарманинг 1,2 млрд доллар йўқотишига олиб келган. Банк раҳбарияти шундан кейин Каббажни бўшатиб юборган.

Банк вакиллари жамғарма раҳбарияти барча молиявий операциялар, сотиб олинаётган ва сотилаётган қимматбаҳо қоғозлардан хабардор бўлганларини ҳамда жамғарманинг бу позициясини асоссиз деб айтмоқдалар.

2014 йилда жамғарма вакиллари Goldman Sachs’ни судга бериб, йўқотилган пулларни қайтаришни талаб қилганлар. Бу иш бўйича тафтиш жорий июнда бошланган.