АҚШ ҳукумати Суриянинг Ҳалаб вилояти ҳудудида ҳукумат қўшинларининг ҳаракатига жавоб тариқасида турли вариантларни кўриб чиқмоқда, улар орасида мухолифат қўллаб-қувватловини кучайтириш варианти ҳам бор.

Муҳокамалар ҳозирча айрим ташкилотлар доирасида кечмоқда ва ҳали Барак Обаманинг столига етиб борганича йўқ. Бу ҳақда Америкадаги юқори мартабали амалдорга асосланиб, Reuters агентлиги хабар берган.

Расмий Вашингтон ҳаракатининг салоҳиятли вариантлари орасида АҚШнинг Форс кўрфазидаги иттифоқдошларига мухолифатни янада кучли қуроллар билан таъминлашга рухсат бериш варианти ҳам мавжуд. 

Кенг миқёсли ҳаракат варианти кўриб чиқилмаяпти, чунки АҚШ президенти Барак Обама америкалик аскарларнинг ҳарбий ҳаракатларда иштирок этишига қарши. Айни пайтда Суриядаги исёнчиларни ҳарбий тайёрлаш ва уларга маслаҳат бериш учун америкалик қўшимча махсус аскарлар жўнатилиши мумкин. Бундан ташқари, Ўрта Ер денгизи шарқида кема ва авиациялар гуруҳи кўпайтирилиши ва исёнчиларга гуманитар ёрдам бериш учун ҳаво коридори очилиши эҳтимоли бор.

Маълум қилинишича, ҳукумат қўшинларининг Ҳалабдаги ҳаракат суръати Оқ уйдагиларни ҳайрон қолдирмоқда. Чунки шаҳарнинг олиниши мухолифат кучларини жиддий зарба остида қолдиради.