«Жиззах» махсус индустриал зонаси (МИЗ)да фаолият кўрсатаётган «Экоклимат» компанияси негизида иссиқлик ўтказмайдиган шиша толали материаллар ишлаб чиқариш корхонаси иш бошлади, дея хабар бермоқда ЎзА.

Лойиҳа қиймати 7 миллион доллар бўлган бу корхона йилига 10 минг тонна ёки 24 миллиард сўмликдан ортиқ маҳсулот ишлаб чиқариш қувватига эга. Маҳсулотларнинг асосий қисмини экспортга йўналтириш мўлжалланган.

ЎзАнинг қайд этишича, корхонада яратилган 100 янги иш ўрнининг аксариятини касб-ҳунар коллежларини битирган ёш мутахассислар банд этган.

Маълумот учун, 2013 йилда «Жиззах» МИЗ ташкил этилганидан буён ҳудудда умумий қиймати 44,1 миллион доллар бўлган 13 корхона фойдаланишга топширилди.