Бухоро тумани Қўшработ қишлоғида яшовчи Илёс Жўраев (исм-фамилиялар ўзгартирилган) ҳалол, мард, уддабурон тадбиркор сифатида танилган эди. Аммо у нафсининг қутқусига учди, ноқонуний хатти-ҳаракатларга қўл урди. Бу ҳақда “Ҳуқуқ” нашри ёзмоқда.

2013 йил 5 апрелда Бухоро туман тадбиркорлик субъектларини рўйхатдан ўтказиш инспекциясида тижорат фаолияти учун мўлжалланган товарларни олиб келувчи юридик шахс бўлмаган якка тартибдаги тадбиркор сифатида Жўрабек Жўраевни рўйхатдан ўтказиб қўйган И.Жўраев амалда фаолиятни ўзи юрита бошлади. Ўша пайтдан 2014 йилнинг сентябрь ойига қадар 4 миллиард 147 миллион 141 минг сўмлик ёғоч маҳсулотларини сотишдан тушган нақд пул белгиланган тартибда банкка топширилмасдан, савдо ва хизмат кўрсатиш қоидалари бузилди.

Бундан ташқари, у Рўзимурод Ботиров номига якка тартибдаги тадбиркорлик субъектини очиб, рўйхатдан ўтказади-ю, фаолиятини ўзи юритади. 2015 йилнинг июнь ойидан 2015 йилнинг октябригача 766 миллион 74 минг сўм миқдоридаги нақд пуллар банкка топширилмайди. Якка тадбиркор сифатида давлат рўйхатидан ўтган Илёс Жўраев 2015 йилнинг июнь ойидан 2016 йилнинг февраль ойига қадар 2 миллиард 134 миллион 675 минг сўмлик ёғоч маҳсулотларини сотиб, пулни банкка топширмайди.

Аммо унинг бу хатти-ҳаракатлари жазосиз қолмади.