Бразилияда турмадан камида 200 маҳбус қочди, деб хабар бермоқда маҳаллий ОАВ.

Воқеа Сан-Паулу штатидаги Жардинополис муниципалитетида юз берган. Қочоқлик турмада маҳбуслар бош кўтарганидан кейин содир этилган: маҳбуслар матрасларни ёқиб, тўсиқнинг тўрт метрлик тўрини йиртиб, қоча бошлашган.

Қўриқчилар уларга қарата ўқ узишган. Қочоқлар ён атрофдаги муниципалитетлардан қидирилмоқда. Бир неча маҳбус тутилган, бир маҳбус қочиш вақтида ҳалок бўлган.

Маҳбуслар турманинг меъёридан тўлгани сабабли бош кўтаришган. Ҳозирда турмадан меъёрдагидан 800 нафар кўпроқ маҳбус сақланади.