Эстонияда ҳар куни рус тилида чоп этиб келинган Postimees газетаси ёпилган. Бу ҳақда «Би-би-си» хабар берди.

Қайд этилишича, 29 сентябрь куни Postimees газетасининг охирги сони чоп этилди.

Шу билан бирга шу таҳририят томонидан нашр этиб борилган «День за днем» номли ҳафталик нашр фаолияти тўхтатилади. Ўқувчилар охирги марта бу газетани 1 октябрь куни ўқишади.

AS Postimees Grupp бу ҳолатни интернет нашрлари бўлмиш Rus.Postimees.ee, Limon.ee ва Krasotka.ee сайтларининг ўқувчилари сони икки баробар кўплиги билан изоҳлаган.

«Кейинги йилларда Эстонияда рус тилида чиқувчи барча газеталарнинг обуначилари кескин даражада қисқарди. Шу билан бир вақтда рус тилидаги онлайн-нашрлар ўқувчилари сони тезлик билан ўсди», — деган нашр бошқарув кенгаши раиси Пеэп Кала.

AS Postimees Grupp томонидан аниқлик киритилишича, обуначиларнинг олдиндан қилинган тўловлари қайтариб берилади.

2015 йилнинг сентябрида Эстонияда Қрим Россияга қўшиб олиниши ортидан рус тилида фаолият кўрсатувчи телеканал очилган.