Нидерландия ҳукумати Pokemon GO дастурчиларига қарши даъво иши очишди. Бунга қўриқланувчи ҳудудларда чўнтак махлуқлари овига киришган оломон сабаб бўлган. 

Гап ҳар куни ноёб ва қимматбаҳо покемонлар пайдо бўлувчи Kijkduin соҳиллари ҳақида бормоқда. Ҳукумат вакиллари минглаб кишиларнинг қумтепаликларга зиён етказишидан хавотирга тушишмоқда. 

Нидерландия ҳукумати ўйин дастурчиларининг тунги соат 23:00дан эрталабки соат 7:00гача соҳиллардан чўнтак махлуқларини йўқ қилишни талаб қилмоқда. Улар август ойидан бери Niantic компанияси билан алоқага чиқишга уринишмоқда, бироқ бунга жавоб олишмади. Натижада фақат судга мурожаат қилиш қолди. The Guardian нашри маълумотига кўра, мазкур иш жорий йилнинг 11 октябрида Гаага судида кўриб чиқилади. 

Ҳукумат ўйин дастурчиларига у қадар кескин талаб қўймади, улар тунги вақтда соҳилга кирилмаса, бу Pokemon GO ўйинчилари учун муносиб жойлигича қолишини таъкидлашган. 

Ўз навбатида франшизага лицензия берувчи The Pokemon Company'нинг маълум қилишича, Niantic баъзи ҳудудлардан покемонларни олиб чиқиш ҳамда муайян объектларни покестоплар рўйхатидан чиқариб ташлаш тўғрисидаги мурожаатлар билан танишиб чиққан.