Туркия президенти Ражаб Тойиб Эрдўғаннинг айтишича, яқин орада янги турк  конституцияси пайдо бўлиши керак.

"Биз тез фурсатларда янги конституцияни қабул қилишимиз лозим. Камида асосий қонунга катта кўламдаги ўзгартиришлар қабул қилиш зарур", деб айтди Эрдўған ёзги таътиллардан кейин парламент сессияси очилишида. 

Эрдўғаннинг айтишича, у 15 июлдаги давлат тўнтарувига уринишдан кейин конституцияни тайёрлаш бўйича амалга оширилаётган илк қадамларни ижобий баҳолайди. "Мен президент сифатида миллий хоҳиш асосида барча муаммолар ечимини кўзда тутувчи конституцияни тайёрлаш бўйича ишларни қўллаб-қувватлайман. Мен умумхалқ тарзда сайланган президент сифатида миллат олдидаги жавобгарлигимни ҳис қиламан", деб қўшимча қилди Эрдўған.      

Эрдўған аввал амалдаги конституция ўрнига янгисини тайёрлаш кераклигини бир неча бор айтиб ўтган. Амалдаги турк конституцияси 1982 йилда Туркияда 1980 йилда содир этилган ҳарбий тўнтарувдан кейин қабул қилинган. Янги конституция устидаги ишлар июлдаги давлат тўнтарувига уринишдан кейин Адолат ва тараққиёт партияси ташаббуси билан бошланди.