Тошкент шаҳрида Мустақиллик шоҳ кўчаси билан туташувчи йўлларнинг аввал ёпилган қисмлари очилишига тайёргарлик кўрилмоқда. 

Мустақиллик шоҳ кўчаси ва Абдулла Қодирий кўчаси кесишмаси. Қурилиш техникаси ва ишчилар Мустақиллик шоҳ кўчаси ва Абдулла Қодирий кўчаси кесишмасида йўлўтказгич олдидаги чиқишни тозалаш ишларини олиб боришмоқда. Бироқ, Тошкент шаҳри ҳокимияти мазкур йўлларнинг қачон очилишига ойдинлик киритгани йўқ, дея хабар қилмоқда Газета.уз сайти. Аммо, ишлар жадаллик билан олиб борилаяпти. Ушбу чиқиш йўлининг очилиши шоҳ кўча бўйлаб Шаҳрисабз кўчасидан Олой бозори томон ҳаракатланаётган автомобиллар оқимини бирмунча камайтиришга хизмат қилиши керак. 

Мустақиллик шоҳ кўчасининг Сайрам 7-проезди билан кесишмаси.

Яқин кунларда, шунингдек, ўтган йилнинг июль ойида бекитилган яна бир чорраҳа, Давлат статистика қўмитаси биноси ёнидаги Сайрам 7-проезди билан туташуви ҳам очилиши кутилаяпти. Бу эса, шу атрофда ишлайдиган ва истиқомат қиладиганлар учун манзилини бир неча километрга яқинлаштиради. 

Мустақиллик шоҳ кўчасининг Сайрам 7-проезди билан кесишмаси.
 
Шу билан бир вақтда, Мустақиллик шоҳ кўчасининг Оққўрғон кўчаси билан кесишмасини ҳам қайта ишга тушириш бўйича чоралар кўрилмоқда. Ўтган йилнинг август ойида бу ерга ҳаракат йўналишини ажратувчи қўйилган эди. 

Қурилиш ишларида қатнашаётган турли хизмат ходимлари шаҳарнинг аввалги йилларда ёпилган турли кўчаларидаги қатновлар ҳам қайта йўлга қўйилиши мумкинлигини айтишмоқда.