Madridning «Real» jamoasi g‘alabasiz seriyasini davom ettirdi. Zaynidin Zidan shogirdlari Primeraning navbatdagi turida ham g‘alabaga erisha olmadi. Bungacha jamoa chempionatning avvalgi turlarida «Vilyarreal» (1:1) va «Las-Palmas» (2:2) jamoalari bilan durang qayd etgan, o‘tgan haftada YeChLning guruh bosqichi 2-turi doirasida Dortmundning «Borussiya» jamoasiga qarshi kechgan bahs 2:2 hisobida yakunlangandi.
Ispaniya chempionatining 7-turida «Eybar»ni qabul qilgan «Real» yana muvaffaqiyatsizlikka uchradi. Mehmonlar jamoasi «qirollik klubi»ga jang taklif qildi va uyga ochko bilan qaytdi. O‘yinning 6-daqiqasida Fran Rikoyening pasini golga aylantirgan Andera Kapa «Eybar»ni olg‘a boshladi. 11 daqiqa o‘tib esa Garet Beyl Krishtianu Ronaldu uzatgan to‘pni darvoza to‘riga yo‘llab, hisobni tenglashtirdi — 1:1.
O‘yinning qolgan vaqtida hisob o‘zgarmadi.
Qayd etish kerakki, Zidan bu o‘yinda jamoaning yetakchi futbolchilari Luka Modrich, Marselo va Kazemiro xizmatlaridan foydalana olmadi. Bu futbolchilar jarohat tufayli turli muddatlarga safdan chiqqan.
7 turdan keyin «Real» Ispaniya chempionati turnir jadvalida 2-o‘rinda, «Eybar» 8-pog‘onada joylashgan.
Real Madrid – Eybar 1:1
Gollar: 0:1 – 6 Riko, 1:1 – 17 Beyl.
Real Madrid – Navas, Varan (Nacho, 46), Danilo, Karvaxal, Pepe, Isko (Asensio, 72), Kroos, Kovachich, Beyl, Ronaldu, Benzema (Morata, 46).
Eybar – Riyesgo, dos Santos, Luna, Kapa, Lejyen, Dani Garsiya, Eskalante, Leon, Riko, Penya (Bebe, 87), Enrik (Kike, 76).
Ogohlantirishlar: Eskalante (29), Karvaxal (44), Beyl (44), Dani Garsiya (48), Morata (56), Lejyen (57), Penya (71), Kroos (73), Riko (84).
