АҚШ Президенти Барак Обама Халқаро олимпия қўмитасининг олимпиада мезбонларини аниқлашдаги қарорлари коррупция борасида шубҳалар уйғотиши ҳақида маълум қилди. Бу ҳақда Rappler нашри хабар тарқатган.

Давлат раҳбари New York Magazine учун берган интервьюсида 2016 йилги Олимпиада мезбонини аниқлаш жараёни ҳақида эслаб ўтган.

"Барча менинг Копенгагенга учишим бизнинг имкониятларимизни ошириши ва бу сафар қилишим учун арзирли сабаб экани ҳақида айтганди. Шу туфайли мен ўшанда Копенгагенга учгандим. Алалоқибат кўрдимки, ХОҚнинг қарорлари ФИФАники каби қабул қилинар экан. Улар - анчайин инсофсиз" деган Обама.

2009 йилнинг октябрида Дания пойтахтида ХОҚ сессияси ўтказилган, унда Рио-де-Жанейро, Чикаго, Мадрид ва Токио шаҳарлари орасида 2016 йилги Олимпиада мезбони аниқланганди. Обама ўшанда Чикагони қўллаб-қувватлаш учун Копенгагенга учиб борганди.

2017 йилнинг 15 сентябрь кунида ХОҚ Перунинг Лима шаҳрида 2024 йилги ёзги олимпиада мезбонини аниқлайди. 2024 йилги Олимпиада мезбонлиги учун Париж, Будапешт ва Лос-Анжелес даъвогарлик қилмоқда.