Европа Иттифоқи Афғонистон ҳукуматига 1,2 млрд доллар миқдорида моддий ёрдам беради. Бу маблағлар ташкилотнинг донор мамлакатлари ҳисобидан тақдим этилади. Бу ҳақда ЕИ дипломатияси раҳбари, Ташқи ишлар ва хавфсизлик сиёсати бўйича олий вакили, Еврокомиссия вице-президенти Федерика Могерини Брюсселдаги конференцияда маълум қилди.

"ЕИ Афғонистонга 1,2 млрд доллар миқдорида ёрдам ажратиш бўйича қарор қабул қилди. Бу конференция нафақат молиявий кўмак кўрсатиш мақсадида, балки Афғонистонни сиёсий томонлама қўллаб-қувватлаш истиқболларини муҳокама этиш мақсадида ҳам ташкил қилинди. Бу мамлакатда хавфсизликни таъминлаш унинг тикланиши учун муҳим аҳамиятга эга ҳисобланади", дея Могеринининг сўзларини келтирган ТАСС ахборот агентлиги.

Унинг қайд этишича, ЕИнинг Афғонистон масаласидаги 2 кунлик конференциясида 70 давлат ва 30 ташкилотдан 100дан ортиқ делегация иштирок этмоқда.

Бундан олдинроқ, Афғонистонни қўллаб-қувватлаш режаси ҳақида Австралия ТИВ раҳбари Жули Бишоп маълум қилиб ўтганди. Унинг сўзларига кўра, расмий Канберра 2020 йилгача ҳар йили Кобулга 80 миллион Австралия долларидан (60 млн АҚШ доллари) ажратиб боради. Бундан ташқари, Австралия Афғонистонга жаҳон озиқ-овқат дастури доирасида 10 млн доллар беради.

"Биз Афғонистон яна халқаро терроризм ўчоғига айланиб қолмаслиги учун барча зарур чораларни кўришимиз керак", деган Бишоп ва Афғонистонда 270 нафар австралиялик ҳарбий сақлаб қолинишини билдирган.