АҚШнинг Флорида штатига "Мэтью" бўрони хавф солгани боис 1,5 миллион аҳоли эвакуация зонасида қолмоқда. Бу ҳақда штат губернатори Рик Скоттнинг расмий сайтида маълум қилинган.

Айрим туманларда эса одамлар ҳукумат томонидан тақдим этилган бошпаналарга кўчирилмоқда. Хабарларга кўра, штатдаги таълим муассасалари оммавий равишда ёпилган.
"Мэтью" бўрони Багам ороларидан ёпирилди. Унинг хавфлилиги учинчи даража деб қайд қилинган. Айни дамда бўрон ичидаги шамол тезлиги соатига 185 км.ни ташкил этмоқда. Унинг Кариб ҳавзасига яқинлашиши оқибатида камида 19 киши ҳалок бўлган.