Нефть экспорт қилувчи давлатлар ташкилоти (ОПЕК) яқиндаги келишувга нисбатан нефть қазиб олиш ҳажмини яна бир фоизга камайтириш бўйича келишувга келишлари мумкин. Бу ҳақда Жазоир энергетика вазири Нуреддин Бутерфа маълум қилди, деб хабар бермоқда Reuters ахборот агентлиги.  

"Венадаги ноябрдаги саммитда биз бозордаги ҳолатга баҳо берамиз ва агар нефть қазиб олиш ҳажмини 700 минг баррелга камайтириш етарличамас деб топсак, унда уни янада камайтирамиз. Ҳозирда картелда ҳамфикрлик кузатилмоқда, шунинг учун нефть қазиб олишни 1 фоизга камайтириш бўйича келишувга келиш осонроқ бўлади", деб айтди Бутерфа.  

6 октябрда Brent маркасидаги нефть Лондоннинг ICE биржасида бир баррель учун 52,35доллар нархида сотилди. Бу ўтган савдолар ёпилишидаги нархдан 0,91 фоизга кўпроқни ташкил қилган. 

Аввалроқ Goldman Sachs инвестицион банки таҳлилчилари 2017 йилда нефть нархи бир баррель учун 55 доллардан ошмаслигини прогноз қилишганди.

28 сентябрда ОПЕКка кирувчи давлатлар нефть қазиб олиш ҳажмини кунига 32,65 млн баррель қилиб чеклашга келишиб олишганди. Бу нефть нархларига ижобий таъсир қилган. Ҳажм бўйича якуний таклифни ноябрдаги учрашувда махсус тузилган мувофиқлаштирувчи комиссия тақдим қилади.