O‘zbekistonda yangi erkin iqtisodiy hudud tashkil etiladi

Samarqand viloyatining Urgut tumanida erkin iqtisodiy hudud barpo etiladi. O‘zbekiston Prezidenti v.b. Shavkat Mirziyoyev viloyatga safari chog‘ida shunday tashabbus bilan chiqqan. 

«O‘zbekiston» telekanalining «Axborot» dasturi xabar qilishicha, ayni vaqtda tumanning 42 gektarlik sanoat hududida 40ta ishlab chiqarish korxonasi faoliyat yuritsa, shulardan 19tasi xorijiy hamkorlar bilan tashkil etilgan. Bu yerda 1200 kishi ish bilan ta'minlangan. 

O‘tgan yili mazkur quvvatlarda 20dan ortiq, 157,5 mlrd so‘mlik sanoat mahsuloti ishlab chiqilgan, eksport hajmi 10 mln dollardan oshib ketgan. 

Sanoat hududida gilamlar va gilam mahsulotlari, sun'iy tola, elektrpechka, gaz plitalari, bir martalik plastik idishlar va boshqa mahsulotlar ishlab chiqiladi, deb yozmoqda Gazeta.uz sayti. 

2017 yili tumanda sanoat mahsulotlarini ishlab chiqish bo‘yicha yana 78ta loyihani amalga oshirish va 3400 ish o‘rnini yaratish rejalashtirilmoqda. 

Bugungi kunda, O‘zbekistonda 3ta iqtisodiy hudud faoliyat yuritadi. Bu yerda sarmoyadorlar uchun biznes yuritish uchun imtiyozlar va alohida imkoniyatlar taqdim etiladi. Bular, Navoiy viloyatidagi «Navoiy» sanoat-iqtisodiy zonasi, Toshkent viloyatidagi «Angren» maxsus industrial zonasi va Jizzax hamda Sirdaryo viloyatidagi «Jizzax» maxsus industrial zonasidir.