Германия ҳукумати Суриядаги вазиятнинг чигаллашаётгани туфайли Россияга қарши янги санкциялар қўллаш имкониятини муҳокама этмоқда. Мамлакат парламенти Бундестагнинг ташқи ишлар бўйича қўмитаси Норберт Реттген Süddeutsche Zeitung газетасига берган интервьюсида ушбу хабарни тасдиқлади

Депутатнинг сўзларига кўра, мазкур ҳолатда Европа ҳеч бўлмаганда Ҳалабдаги жанговар ҳаракатларни ҳарбий жиноятларга тенглаштириши мумкин. «Ҳарбий жиноятларга эътиборсизлик ва унинг оқибатлари можароларга сабаб бўлади», — дея қўшимча қилган немис парламенти депутати. 

Реттгеннинг тан олишича, Россияга қарши санкциялар тезда ўз натижасини бермайди, аммо узоқ истиқболда Москва сиёсатини ўзгартиришга мажбур бўлади. Парламент қўмитаси раҳбари шунингдек, ЕИнинг бошқа мамлакатларини танқид қилиб, уларни РФга қарши янги чекловлар жорий этишга қўрқаётганликда айблаган. 

6 октябрь куни The Wall Street Journal нашри ўз манбасига таянган ҳолда, Германия ЕИнинг Россияга қарши янги жазо чораларини киритиш ташаббуси билан чиқиши мумкинлиги ҳақида ёзган эди. 

Россия президенти матбуот котиби Дмитрий Песков эса ушбу хабарга ўз фикрини билдирар экан, Москва қўшимча иқтисодий чекловлар учун жиддий сабаб кўрмаётганини айтганди. 

«Келинг, унутмайлик, Россия Федерацияси — халқаро ҳуқуқ нуқтаи назаридан баҳолаганда Қуролли кучлари Сурия Араб Республикасида қонуний бўлиб турган ягона давлатдир. Шу билан бирга, барчамиз биламизки, ўз Қуролли кучларини САРда халқаро ҳуқуққа риоя қилмаган ҳолда жойлаштирган мамлакатлар ҳам бор», — деб таъкидлаган эди Песков. 

Бундан аввалроқ, Оқ уй расмий вакили Жош Эрнест маълум қилганидек, Қўшма Штатлар Россиянинг Суриядаги сиёсатига таъсир ўтказиш мақсадида янги санкциялар қўллаш имконини рад этмайди.