Анқарада икки нафар худкуш-террорчи полиция операцияси ўтказилаётган вақтда ўзини ўзи портлатиб юборди. Уларнинг жойи текширилганда бомба ясаш учун ишлатиладиган 200 кг.га яқин модда топилган. Бу ҳақда Анқара губернатори Эржан Топаджа NTV телеканали эфирида маълум қилган.

"Улардан бирининг (террорчининг) шахси аниқланди. Иккинчиси тахминларга кўра, аёл киши бўлган. Учинчилари ҳам бўлган деган шубҳа бор. Уни қидириш ишлари давом этмоқда", - деди губернатор.

Унинг қўшимча қилишича, террорчилар Туркиянинг жануби-шарқидаги шаҳар Диёрбакирдан Анқарага келишган ва қидирувда бўлишган.

Губернаторнинг сўзларига кўра, Анқарада тахминан уюштирилажак терактда фойдаланилиши кўзда тутилган минали автомашина Туркияда тақиққа эга Курдистон ишчи партиясига тегишли бўлган.

NTV хабарига кўра, терактга тайёргарлик бўлаётгани ҳақида маълумот олган полиция маҳаллий вақт билан 06:00да (Тошкент вақти билан 08:00) Анқарадан 30 км. масофада бўлган Хайман туманидаги уйлардан бирини қуршаб олади.

Полиция жангариларга таслим бўлиш ҳақида буйруқ берганда, улар ўзларини портлатиб юборишади.

Полиция ходимлари орасида жабрланганлар йўқ, деб хабар бермоқда NTV.