7 октябрда Россия президенти Владимир Путин ўзининг 64 ёшини қаршилади. Жаҳондаги турли воқеалар сабабли Путиннинг шахси турлича қабул қилинади, баъзилар унинг сиёсатини қўллаб-қувватлайдилар, баъзилар маъқулламайдилар. Бироқ қуйида биз бу ҳақда тўхталмаймиз, шунчаки Путиннинг ҳаётидан ҳаммага ҳам маълум бўлмаган фактлар билан таништирамиз.

Владимир Путин Ленинградда Фонтанка соҳилбўйи ёнидаги Басков кўчасидаги коммунал квартирада катта бўлган.

Путин оилада учинчи ўғил бўлган, бироқ унинг урушгача туғилган икки акаси ҳам ёшликларида вафот этиб кетишган.

1952 йилда Ленинграддаги Спасо-Преображенский черковида чўқинтирилган.

Путиннинг отаси – Владимир Спиридонович Путин Иккинчи жаҳон уруши қатнашчиси, заводда уста бўлган. Онаси – Мария Ивановна Шеломова ҳам заводда ишлаган, Ленинград қамалидан омон чиққан.

Путиннинг бобоси Спиридон Иванович Путин жуда таниқли ошпаз бўлган, у партия раҳнамоларига таом тайёрлаган. У Лениннинг бош ошпази бўлган, бир неча бор Сталинга таом тайёрлашига тўғри келган. 

Володя ёшлигидаёқ разведкачилар ҳақидаги фильмларга қизиққан ва давлат хавфсизлиги идораларида ишлашни орзу қилган.

Путин иккита мактабда ўқиган: 8-синфдан кейин ўқишни махсус кимё мактабида давом эттирган. Бироқ, таъкидланишича, у мактабда аниқ фанлардан ўртамиёна ўқиган.

Бир марта Володя мактабнинг 4-қаватидаги балконнинг ташқи томонидан қўлида осилиб тура олишига баҳс бойлаган ва бу баҳсда ғолиб чиққан.

У 9-синфда ўқаётганда 10-синф ўқувчиси уни тепган. Улар орасида низо чиққан ва дарсдан кейин бутун 10-синф Володя билан "гаплашиб қўйиш учун" уни ташқарида пойлаб турган. КГБнинг бўлғуси агенти бу низода ғолиб чиққан.

Битирув кечасида Володя синф раҳбари билан 20 та пирожний ея олишига баҳс бойлаган, бироқ ўша куни у "бор-йўғи" 14 тагина пирожний ея олган.

Бўлғуси рафиқаси билан Ленинград давлат университетида ўқиб юрганида танишган. Улар турли факультетларда таҳсил олишган: Путин – ҳуқуқшуносликда, унинг рафиқаси Людмила Путина эса филологияда.

Путин дзюдо бўйича Ленинград чемпиони, "Труд" кўнгилли спорт жамияти чемпиони, Собиқ иттифоқ кубоги совриндори, "Жальгирис" ва "Калев" кўнгилли спорт жамиятлари чемпиони ҳисобланади, бир неча маротаба ОТМлар орасидаги чемпионатлар ғолиби бўлган.

Путин 18 ёшида дзюдо бўйича қора белбоғ соҳиби бўлган.

Путин 1973 йилда самбо бўйича, 1975 йилда дзюдо бўйича спорт устаси номини олган. 

1974 йилда лотереяда "Запорожец" машинасини ютиб олган.

Университетдан кейин Путиннинг ёшликдаги орзуси рўёбга чиққан, у КГБ (Давлат хавфсизлик қўмитаси)га ишга юборилган, агентурада ишлаган ва янги агентларни ёллаш билан шуғулланган.

Путин анча йиллар давомида ташқи разведка идораларида ишлаган, разведка мактабида таҳсил олган.

1983 йил 28 июлда Владимир Путин ва Людмила Путина турмуш қуришган.

Улар икки қиз фарзандли бўлишган: Мария ва Катерина.

Путиннинг қизлари коллежларда бошқа исмлар остида ўқишган, уларнинг болалиги ГДРда ўтган.

Путин 1985-1990 йилларда ГДРда Дрезден дўстлик уйи директори лавозими остида разведкачилик фаолиятини давом эттирган. 

Путин немис тилини мукаммал билади.

У ҳанузгача Германиядаги ишининг биринчи ойларини титроқ билан эслайди: у телефон чалиниб, у ерда немис нутқини эшитиб унга жавоб бера олмасликдан жуда қўрққан. Унга бу қўрқувни енгиш учун 2 ой кифоя қилган.

Путин 1991 йилдан бошлаб Санкт-Петербург мэриясининг ташқи алоқалар қўмитаси раиси бўлиб ишлаган.

1994 йилдан эса Санкт-Петербургнинг ўша пайтдаги мэри Анатолий Собчакнинг биринчи ўринбосари сифатида фаолиятини давом эттирган.

Путин Собчак билан бирга ишлаган кезларда ўша пайтда урф бўлган қулупнай ранг ёки яшил пиджак билан "Адидас" спорт шимини бирга кийиб юрган пайтлари ҳам бўлган.

1999 йилда Путин ҳаммуаллифлигида дзюдодан амалий машғулотлар бўйича "Учимся дзюдо с Владимиром Путиным" деган китоби нашрдан чиққан.

Путин шарқ яккакурашларидан ташқари, тоғ чанғиси билан қизиқади ва бу борада анчагина маҳоратга эга.

Кўп йиллардан бери географик хариталар ва буюк шахсларнинг тасвири туширилган почта маркаларини тўплаб келади.

Путин бир қатор хорижий мукофотлар билан тақдирланган. Улар орасида Франциянинг Фахрий легиони ордени катта хочи бор. Унга бу кўкрак нишонини Франциянинг собиқ президенти Жак Ширакнинг шахсан ўзи топширган.

Путин 10 та шаҳарнинг фахрий фуқароси ва бешта хорижий университетнинг фахрий доктори ҳисобланади.

Шунингдек, тинчликни сақлашдаги хизматлари учун "Конфуций номидаги тинчлик мукофоти" совриндори ҳисобланади.

Путин жосуслар ҳақидаги романларни яхши кўради. "Мени бир киши бутун бир армиялар қила олмаган ишни бир ўзи қилиши ҳаммасидан кўпроқ ҳайратлантиради", деб айтади Путин.

2013 йил 6 июнда Владимир Путин ва Людмила Путина 30 йиллик биргаликдаги турмушдан сўнг ўз хоҳишларига кўра ажрашишларини маълум қилишган.

Путин балиқ овлаш ва табиатда бўлишни жуда яхши кўради.

У 2013 йилда Тувадаги кўлда ҳордиқ вақтида 21 кг лик чўртан балиқни қармоққа илинтирган.

Путиннинг қароргоҳида ҳам жуда кўп жонзотлар бор: тўртта ити – Кони лақабли лабрадор, иккита пудель ва Баффи лақабли булғор овчаркаси (каракачан), Сказка лақабли эчкиси ва унинг боласи, Вадик лақабли пакана оти бор.

Путин гоҳида жонзотлардан "таъсир қилиш қуроли сифатида ҳам фойдаланади". Мисол учун, Германия канцлери Ангела Меркель итлардан жуда қўрқади. Унинг ходимлари канцлернинг ташрифлари вақтида ҳеч қаерда ит бўлмаслиги кераклигидан олдиндан огоҳлантириб қўядилар. Бироқ Путин Меркель билан учрашувларидан бирига ити билан бирга келган. Меркель ўзини аранг ушлаб турган, Путин эса ундан ҳеч нарсадан хабари йўқдек, "Ит сизни чўчитмаяптими?", деб сўраган.

Путин президент бўлишидан бироз олдин унинг ҳаётида нохуш воқеа юз берган: унинг дала ҳовлиси ичидаги барча нарсалар ва пуллари билан бирга ёниб кетган, у эса оиласи билан ёнғиндан аранг қутулиб қолган. У кул бўлган вайроналар орасидан оловдан деярли шикастланмаган хочини топиб олган.

Путин қўл соатларини фақатгина ўнг қўлида тақиб юради. Унинг айтишича, шунда соатнинг мурувати қўл панжаларини ишқамайди.

Путин ҳақида ўндан кўпроқ ҳужжатли фильмлар суратга олинган, "Номаълум Путин", "Президент биродари", "Путин тизими, "55", "Девор", "Путин, Россия, Ғарб", "Ҳақиқий Путин", "Мен, Путин. Портрет" шулар жумласидан.

Россия президенти ҳақида "Матбуот учун бўлмаган бўса" деб номланган бадиий фильм ҳам суратга олинган.

Суратлар: trinixy.ru