Швеция Россия томонидан ҳарбий таҳдиддан хавфсираб, аёлларни ҳам мажбурий армияга чақиришни режалаштирмоқда. Қўшни Норвегияда бундай тизим аллақачон йўлга қўйилган, сиёсатчиларнинг сўзларига кўра, катта хавф олдидаги кичик мамлакатлар учун армияга икки жинс вакилларини чорлаш оптимал вариант ҳисобланади. Бу ҳақида The Washington Post хабар берди

Манбага кўра, аёлларни армияга чақириш тўғрисидаги қонун 2017 йилда кучга кириши мумкин. Аёлларнинг армияда хизмат қилиши Швеция аҳолиси учун ажабланарли эмас, зеро мамлакатдаги гендер фарқлар аста-секин ўчиб бормоқда. 

Яқинда ўтказилган сўровномада шведларнинг 70 фоизи аёлларнинг чақирувга асосан армияда хизмат қилишини қўллаб-қувватлашди. Ҳеч қандай дискриминация ҳақида гап ҳам бўлиши мумкин эмас, чунки бу ерда жамият гендер тенглик асосига қурилган. 

Экспертларнинг сўзларига кўра, Европа мамлакатларида аёлларни армияга чақиришни йўлга қўйиш Россия томонидан ҳарбий таҳдид олдидаги қўрқуви билан боғлиқ. Швеция, Норвегия ва Финляндиядан маълум қилишларича, Россия уларни босиб олиши учун атиги бир неча соатнинг ўзи етарли бўлади, бу Россия армияси хизматчилари сонига кўра уларни анча ортда қолдириши билан изоҳланмоқда. 

Экспертларнинг таъкидлашича, Швеция дунёдаги ҳарбий босимга ҳаддан зиёд секин муносабат билдирмоқда. Уларнинг фикрича, мамлакат жуда узоқ вақт давомида "енгил" армияга умид қилган. Шунга қарамай, Евроосиё хавфсизлиги масалалари бўйича мутахассис Кейр Жайлснинг айтишича, Россиянинг Швецияга ҳужум қилиш эҳтимоли жуда кам.