АҚШ Ҳарбий-денгиз кучлари эсминеци халқаро сувларда сузиб юрган вақтида унга қарата Яман қирғоқларидан туриб ракета учирилди. Бу ҳақда Пентагон вакилига асосланиб, Рейтер агентлиги хабар берди.

Агентлик маълумотига кўра, ракета зарбаси ҳусийчилар назоратидаги ҳудуддан берилган.

Америкалик ҳарбий манбанинг маълумотига кўра, ҳужум оқибатида талофатлар йўқ.

Яманда 2014 йилнинг ёзида зиддиятлар бошланди. Собиқ президент Али Абдулла Салоҳ тарафдорлари бўлган ҳусийчиларни (шиалар) бирлаштирган "Ансор Аллоҳ" ташкилоти ҳозирги президенти, сунний Абд Мансур Ҳодийни пойтахтдан қувиб юборишгач, Саудия Арабистони бошчилигидаги араб коалицияси Яманнинг қонуний ҳукуматини ёқлаб чиқди ва 2015 йилнинг мартида коалиция кучлари Яманда ҳарбий ҳаракатлар бошлади. Шундан сўнг қонли можаролар янада авж олиб кетди.