Мадриднинг As спорт нашри раҳбари Альфредо Реланьо “Барселона” ҳимоячиси Жерар Пикедан енги кесилган Испания терма жамоаси либоси атрофида можаро юзага келтиргани учун узр сўради.

“Умид қиламанки, Пике ҳам ЖЧ-2018 мусобақасидан кейин терма жамоадаги фаолиятини якунлаш борасидаги қарорини Месси каби қайта ўйлаб кўради. Мен унинг қарорини тушунаман – унга нисбатан туҳмат қилишди. У “Реал”га нисбатан доимо жанговар муносабатда бўлган, ижтимоий тармоқларда ҳам уларга қарши изоҳлар ёзган, бироқ Испания терма жамоаси ҳақида гап кетганида, у доимо ўрнак бўлган. “Барселона” ўз тарихида Испания терма жамоасига энг кўп ўйинчиларни етказиб берган ва буни рад этиш керак эмас.

Терма жамоа либосининг енги борасидаги воқеа унинг сабр косасини тўлдирди. Ундан шошқалоқлигимиз учун узр сўрайман. Сабаби, As онлайн-нашри бу воқеа ҳақида биринчи бўлиб хабар берди ва бу ижтимоий тармоқ фойдаланувчиларнинг норозиликларини келтириб чиқарди. Бундай шов-шувлар кам ҳолларда яхшиликка олиб келади. Умид қиламанки, Пике ўз қарорини ўзгартиради”, – деди Реланьо.

ЖЧ-2018 мусобақасининг саралаш босқичида Испания Албанияга қарши курашиб, 2:0 ҳисобида ғалаба қозонди. Пике ушбу ўйинга енгида мамлакат байроғи бўлмаган либосда майдонга тушди. Шундан сўнг ижтимоий тармоқлардаги футбол мухлислари ва ОАВ “Барселона” футболчисини танқид остига олишди. Бироқ RFEF баёнотида Пике енги узун футболкада майдонга тушгани ва унга Испания байроғи ранглари сиғмаслиги айтиб ўтилган.