SpaceX компанияси президенти Гвен Шотвелл компания 1 сентябрда Falcon 9 ракетасининг портлаши сабабини билишга яқинлашганини маълум қилди, деб хабар бермоқда Spacenews портали.

9 октябрда Миллий муҳандислик академиясининг ҳар йилги учрашувида Шотвелл воқеа ракетанинг конструкциясидаги хатоликлар туфайли юз бермагани тахминини билдирди. "Менинг фикримча, эътиборни ракета ёки уни лойиҳалашдаги муаммоларга эмас, бизнес-жараёнлар  билан боғлиқ муаммоларга қаратиш керак", деб айтди Шотвелл.

Шотвелл қандай муаммолар портлаш сабаби сифатида қаралаётгани ҳақида тафсилотларга берилмади. 

Аввалроқ компания ракета кислород баллони ишидаги носозлик туфайли юз берганини, кейинроқ эса бунда рақобатчилар "қўли борлигини" маълум қилганди.