Австралиянинг Квинсленд штатида истиқомат қилувчи киши уяли алоқа операторини ўзгартиришга қарор қилганидан сўнг унга 170 минг Австралия доллари (тахминан 129 минг АҚШ доллари) ҳисобини тақдим этишди. Бу ҳақида 10 октябрда The Sydney Morning Herald нашри маълум қилди

Манбага кўра, Маррей Клод дастлаб Telstra телекоммуникация компанияси билан уй интернети ва уяли алоқа хизматларини тақдим қилишга доир шартнома имзолаган. Бироқ фирма тақдим қилган интернетга уланиш тезлиги ҳаддан зиёд пастлиги туфайли Австралия фуқароси провайдерни ўзгартиришга қарор қилган. 

Клод ўзининг аввалги рақамини сақлаган ҳолатда бошқа оператор билан шартнома тузмоқчи бўлганида қарз сабабли Telstra'дан рад жавобини олган. Клоднинг сўзларига кўра, у барча тўловларни ўз вақтида амалга оширган. Фирма вакилининг таъкидлашича, компания мазкур иш юзасидан тергов иши олиб борган, бироқ ҳозирча бу қарз сабабини аниқлашга муваффақ бўлмаган.