Туркия президенти Ражаб Тоййиб Эрдўған россиялик ҳамкасби Владимир Путин билан Истанбулда музокаралар ўтказди. Сиёсатчилар бундан аввал, Жаҳон энергетика конгрессининг махсус сессиясида ҳам иштирок этишди. Таъкидлаш жоизки, бу учрашув икки давлат етакчиларининг охирги икки ойдаги учинчи учрашувидир. Австриянинг Der Standard нашрига кўра, Анқара ва Москва алоқаларининг мустаҳкамланиши Туркиянинг АҚШ ва ЕИ бераётган ижросиз ваъдалардан ҳафсаласи пир бўлганини кўрсатади. 

«Эрдўған Сурияга кириши учун Россиянинг розилигини қўлга киритишни хоҳлаган эди. Анқара курдларнинг ғалабали юришига чек қўйишни истаётганди», — деб ёзади мақола муаллифи. 

Мақолада ёзилишича, Владимир Путин «турк қўшинларининг Сурияга киришига рухсат берганига жавобан, Эрдўған ҳам ҳамкасбидан қарздор бўлиб қолгани йўқ. Кутилмаганда, Туркия раҳбари Россиянинг Суриядаги ҳаракатларини танқид қилмай қўйган».

Шу билан бир вақтда, Қўшма Штатлар «турк етакчисини ялинтирмоқда» ва ҳамон ҳарбий давлат тўнтаришини уюштирганликда гумон қилинаётган Фатҳуллоҳ Гуленни топшираётгани йўқ. Ўз навбатида, ЕИ ваъда қилган визасиз тартибни жорий қилишни хоҳламай, «оёқ тираб туриб олган». 

«Шунга қарамай, Эрдўған яккаланиб қолгани йўқ. Унинг халқаро майдонда аввалги янги қадрдони бўлган — Владимир Путин бор», деб ёзади Австрия нашри.