Россия Аралаш жанглар санъати (MMA) иттифоқи президенти, собиқ MMA курашчиси Фёдор Емельяненконинг вояга етмаган қизига ҳужум қилингани ҳақидаги хабарлар спортчининг матбуот котиби томонидан тасдиқланди. Бу ҳақда ТАСС хабар берди.

"Ҳа, Федор Емельяненконинг қизига ҳужум бўлган. Айни вақтда қизча ўзини яхши сезмоқда. У реанимацияга тушмаганди. Бу ҳодиса билан ҳуқуқ-тартибот органлари шуғулланишмоқда. Ҳозирда тегишли текширувлар олиб борилмоқда", деган Юлия Куклина.

У Емельяненконинг оиласи бу ҳодиса бўйича изоҳ бермаслигини қўшимча қилган.

Ўтган ҳафтада Москвада Емельяненконинг 9 ёшли қизига ҳужум қилингани ва бунинг оқибатида у шифохонага тушиб қолгани ҳақида хабар қилинганди. Аммо кейинчалик Фёдорнинг 16 ёшли қизига ҳужум уюштирилгани маълум бўлди.

Маълумот учун, Фёдор Емельяненконинг биринчи турмушидан 1999 йили Мария исмли қиз туғилган. Унинг иккинчи турмушидан 2007 йили Василиса, 2011 йилда эса Елизавета исмли қизлар дунёга келган.