Рим шаҳрида «Тинчлик ўйини» номи остида Рим Папаси Франциск ташаббуси билан иккинчи марта хайрия учрашуви ташкил этилди. 

Унда бразилиялик Роналдиньо ва Аргентина футбол афсонаси Диего Марадона бошчилигидаги икки жамоа ўзаро учрашди.

Учрашув 12 октябрь куни Римдаги "Олимпико" стадионида ўтказилди ва  Роналдиньо бошчилигидаги «Оқлар» жамоаси  Марадонанинг «Кўклар» жамоасини 4:3 ҳисобида енгди.

Ғолиблар сафида Кануте (5-дақиқа), Боян Кркич (34), Эрнан Креспо (67) ва  Фернандо Кавенаги (78) голларга муаллифлик қилган. «Кўклар» сафида эса Антонио Ди Натале (2), Франческо Тотти (22) ҳамда Николас Бурдиссо (68) биттадан гол урган.

Ушбу хайрия учрашувидан йиғилган маблағлар гуманитар мақсадларда сарфланади. Маблағнинг асосий қисми 24 август кунги зилзиладан жабрланган италияликлар учун йўналтирилади.