Швециянинг ғарбий қисмида жойлашган Варберг шаҳрида масхарабоз ниқобдаги номаълум киши 19 ёшли йигитга пичоқ билан ҳужум қилди. Бу ҳақида SVT телеканали хабар берди

Полиция ходими Улла Бремнинг маълум қилишича, йигит елкасидан жароҳат олган, унинг ҳаёти хавф остида эмас. 

Воқеа 13 октябрь, пайшанба куни кечқурун содир бўлган. Жиноятчи қочиб қолган, ҳуқуқни муҳофаза қилиш органлари қидирув ишларини олиб боришмоқда. 

Шунингдек 13 октябрь куни Британиянинг The Independent нашри сўнгги ҳафта ичида Лондон ва Бирлашган Қиролликда қотил-масхарабозларнинг бир қатор ҳужумлари қайд қилинганини хабар қилган. 11 октябрь, сешанба куни Лондоннинг Брунель университети ётоқхонаси ёнида масхарабоз кийимини кийиб, одамлар кетидан арра билан қувган талаба қўлга олинган. Манчестерда ҳам бир неча қуролланган "қотил-масхарабозлар"ни кўришган. 

Манбага кўра, "қотил-масхарабозлар" тренди Буюк Британияга АҚШдан кириб келган. Ҳуқуқ-тартибот ходимлари бутун мамлакат бўйлаб масхарабоз кийимларини кийиб, маҳаллий аҳолини қўрқитишга ҳаракат қилаётган бир гуруҳ ёшларни қўлга олишмоқда. 

Тарихдаги энг машҳур "қотил-масхарабоз" Жон Гейси бўлган. У 1972 йилдан 1978 йилга қадар 33 нафар кишига ҳужум қилиб, уларни ўлдирган.