Швед академияси адабиёт йўналишида Нобель мукофотига сазовор бўлган Боб Дилан билан боғланишнинг уддасидан чиқмади. Бу ҳақида 14 октябрь, жума куни академия матбуот котиби Ульрика Челлин ТАСС агентлигига маълум қилди. 

"Биз унинг агенти билан боғландик, бироқ Боб Дилан Лас-Вегасдаги концертидан олдин ухлаётган экан, шу боис у билан шахсан гаплаша олмадик", - дея таъкидлади у. Челлин Швед академиясининг доимий котибаси Сара Даниус кун бўйи Диланга қўнғироқ қилиб тушишга ҳаракат қилганини таъкидлади. 

Манбага кўра, у Диланнинг 10 декабрда бўлиб ўтадиган мукофотни топшириш маросимига келиш-келмаслигини аниқлаши зарурлигини айтган. 

Кеча 13 октябрь, пайшанба куни Лас-Вегасда Диланнинг концерти бўлиб ўтди. The Guardian маълумотига кўра, концерт давомида қўшиқчи Нобель мукофоти ҳақида ҳеч нарса демаган. 

Шу куни Дилан "Америка қўшиқчилик анъаналари доирасидаги янги шеърий ифодалари учун" мукофотга муносиб кўрилган. Мукофот пули 2016 йилда 8 миллион швед кронини (923 минг АҚШ доллари) ташкил қилди. Сара Даниус экспертларни бундай қарор учун айбламасликларига умид билдирди ва Боб Диланни Гомер ва Сафога тенглаштирди.