Тошкентда 18-19 октябрь кунлари Ислом ҳамкорлик ташкилоти Ташқи ишлар вазирлари кенгашининг 43-сессияси бўлиб ўтади. Бу ҳақда ЎзА хабар бермоқда. 

57 мамлакат аъзо бўлган Ислом ҳамкорлик ташкилотининг ушбу йирик анжумани бутун дунё журналистларида катта қизиқиш уйғотмоқда. Сессияни ташкилотга аъзо, кузатувчи, мулоқот бўйича шерик ҳамда меҳмон сифатида таклиф этилган мамлакатларнинг оммавий ахборот воситалари, қатор халқаро ахборот агентликлари, телеканаллар, матбуот ва интернет нашрлари ҳам ёритиб бориш истагини билдирган.  

Уларга кенг имконият яратиш мақсадида “Wyndham” меҳмонхонасида барча қулайликларга эга халқаро матбуот маркази ташкил этилди. Бу ерда  жаҳон стандартларига жавоб берадиган замонавий техника – юқори тезликдаги интернет ва Wi-Fi алоқаси, электрон намойиш стендлари, компьютерлар, принтерлар, телефонлар ва бошқа кўп функцияли қурилмалар ўрнатилган. 

Ушбу замонавий матбуот маркази дунё жамоатчилигига сессия жараёни ҳақида жонли ва тўлақонли маълумот бериб боришга имконият яратади.