Туркия президенти Ражаб Тойиб Эрдўған Анқара Ироқнинг Мўсул шаҳрини ИШИД жангариларидан озод қилиш бўйича операцияда иштирок этмоқчи эканлигини маълум қилди. Бу ҳақда Reuters ахборот агентлиги хабар бермоқда.   

Агар Бағдод ва Вашингтон турк ҳарбийларининг ёрдамидан воз кечса, Эрдўған "Б режа"ни амалга оширишга ваъда берди. Бу режа нимадан иборатлигини Эрдўған ошкор қилмаган.

13 октябрда Эрдўған матбуот котиби Иброҳим Қалин Анқара Мўсулни озод қилиш бўйича операциянинг салбий оқибатлари – юз минглаб қочқинлар Туркия чегарасига ёпирилиши мумкинлигидан хавфсираётганини айтганди. У Мўсул учун жангда катта роль курд тузилмаларига берилаётганидан норозилик билдирган. Қалиннинг айтишича, унинг давлатида Ироққа нисбатан ҳеч қандай яширин режалар йўқ.

29 сентябрда БМТнинг қочқинлар ишлари бўйича олий комиссарининг Ироқдаги вакили Бруно Гедде Мўсулни озод қилиш гуманитар фалокатга олиб келиши, қочқинлар сони эса миллионга яқинни ташкил қилиши мумкинлигидан огоҳлантирганди.

Мўсул Ироқнинг йириклиги бўйича иккинчи шаҳри бўлиб, у 2014 йилдан бери ИШИД назоратида қолмоқда.