«Milliy tiklanish» partiyasidan O‘zbekiston Prezidentligiga Sarvar Otamuratov nomzodi tasdiqlandi

Toshkentda 15 oktabr kuni O‘zbekiston «Milliy tiklanish» demokratik partiyasining navbatdagi s'yezdi bo‘lib o‘tdi. Bu haqda partiya matbuot xizmati xabar berdi.

Unda partiya Ustaviga muvofiq Qoraqalpog‘iston Respublikasi, viloyatlar va Toshkent shahar partiya tashkilotlari konferensiyalarida saylangan delegatlar, partiya Markaziy Kengashi, Markaziy nazorat-taftish komissiyasi va partiyaning Oliy Majlis Qonunchilik palatasidagi fraksiyasi a'zolari ishtirok etdi.

S'yezdda 4 dekabr kuni bo‘lib o‘tadigan O‘zbekiston Prezidenti sayloviga partiya nomzodini ilgari surish masalasi ko‘rib chiqildi.

Delegatlar partiya Markaziy kengashi VII plenumida tavsiya etilgan nomzod — kengash raisi, Oliy Majlis Qonunchilik palatasidagi partiya fraksiyasi rahbari Sarvar Sadullayevich Otamuratovni O‘zbekiston Prezidentligiga nomzod etib tasdiqladi.

Nomzod delegatlarni o‘zining saylovoldi dasturi bilan tanishtirdi. Delegatlar mazkur dastur yuzasidan o‘z fikr-mulohazalarini bildirdi.

Shuningdek, s'yezdda kun tartibidagi boshqa masalalar ham ko‘rib chiqildi. Saylov kampaniyasini yuqori tashkiliy darajada o‘tkazish yuzasidan qator vazifalar belgilandi.

Eslatib o‘tamiz, bungacha O‘zXDPdan Hotamjon Ketmonov, «Adolat» SDPdan Narimon Umarov O‘zbekiston Prezidentligiga nomzod sifatida ilgari surilgan edi.