Ҳиндистоннинг Гоа штатида Россия давлат раҳбари Владимир Путин ва Ҳиндистон бош вазири Нарендра Моди ўртасида музокаралар бўлиб ўтди. Шундан сўнг, давлат ва ҳукумат раҳбарлари ОАВ учун матбуот анжумани ўтказишди. 

Нарендра Моди ўз баёнотини "икки янги дўстдан эски қадрдон яхши", деган рус мақоли билан бошлаган.

"Ҳиндистон ва Россия ўртасидаги музокаралар, бизнинг алоқаларимизга аниқ йўналиш,  янада кучлироқ туртки беради", - деган ҳинд ҳукумати раҳбари. У, ўзаро мулоқотни кенг қамровли ва фойдали бўлганини қайд этган. 

Моди бу сафарги учрашувда эришилган келишувлар орасида, 200та Ка-226Т вертолётларини биргаликда ишлаб чиқариш бўйича келишувни ҳамда нефтгаз соҳасидаги алоқаларнинг ривожланишини алоҳида эътироф этган. 

Бош вазирнинг айтишича, томонлар иқтисодий алоқаларни кенгайтириш, ривожлантириш ва чуқурлаштиришни давом эттиради. 

Моди шунингдек, расмий Москва Ҳиндистоннинг халқаро терроризмга қарши курашини қўллаб-қувватлаётганини билдирган. 

Владимир Путин ва Нарендра Моди ўртасидаги музокаралар якунида жами 18та ҳужжат имзоланган ҳамда глобал тинчлик ва барқарорликка эришишга оид ёндашувлар бўйича қўшма баёнот қабул қилинган.