Samarqandda tungi klublar bo‘yicha o‘tkazilgan reydda 200 ga yaqin odam ushlandi

Samarqandda tungi klublar bo‘yicha reyd o‘tkazildi. Reyd natijalariga ko‘ra 200 ga yaqin odam ushlandi. Tungi klub, restoran va internet-kafelarning 10 dan ko‘proq egalari ma'muriy javobgarlikka tortildi. Bu haqda Samarqandning "STV" teleradiokompaniyasi ma'lum qildi.

Samarqand huquq-tartibot muassasalari tomonidan "Bazalik", "Voys", "Uchrashuv" , "Daymond Xoll" va boshqa tungi klublar bo‘yicha o‘tkazilgan tekshiruvda mehnat qonunchiligi, sanitar me'yorlar buzilgani aniqlandi. Huquq-tartibot muassasalari xodimining aytishicha, tungi klublar soat 23.00gacha ishlashi mumkin. Aks holda huquq-tartibot muassasalari tomonidan tungi klublar egalariga nisbatan muayyan choralar ko‘riladi.

Joriy yilning o‘tgan 9 oyida Samarqand hokimiyati huquq-tartibot muassasalari bilan birgalikda Samarqand viloyatidagi tungi klublar bo‘yicha 700 dan ko‘proq, Samarqand shahri bo‘ylab esa 130 ta reyd o‘tkazgan. Buning natijasida qoidabuzarliklar anchagina kamaygan.