Абд Раббо Мансур Ҳодий бошчилигидаги Яман ҳукумати Араб давлатлари лигасининг (АДЛ) 28-саммитини ўз ҳудудида ўтказишни рад этди, деб маълум қилди АДЛ.

АДЛ саммити ротация асосида 2017 йил Яманда ўтиши керак эди.

Бу ҳақда АДЛ бош котиби Аҳмад Абул Ғайтга Яманнинг АДЛдаги доимий вакили маълум қилди. 

"Яманнинг доимий вакили АДЛ бош котибига Яман ташқи ишлар вазири Абдудмалик ал-Маҳлафийнинг мамлакатдаги вазият баён қилинган ҳамда Яман ҳозирда унга солинаётган таҳдидлар сабабли АДЛ саммитини қабул қила олмаслиги ҳақидаги оғзаки хабарини етказди", деб айтилди АДЛ хабарида.

Яманда 2014 йилдан бери бир томонида "Ансор Аллоҳ" шиа ҳаракатининг исёнчи-ҳусийчилари ва Яманнинг собиқ президенти Али Абдуллоҳ Салоҳни қўллаб-қувватловчи армиянинг бир қисми, иккинчи томонида ҳукумат қўшинлари ва мамлакат президенти Ҳодийни қўллаб-қувватловчи кўнгиллилар бўлган қуролли ихтилоф давом этиб келмоқда.