16 октябрь, якашанба куни Ореокастро шаҳри яқинидаги лагерда грек полицияси ва муҳожирлар ўртасида тўқнашув рўй берди. Бу ҳақида полициядаги манбасига таяниб, "Francе press" маълум қилди

Бир неча ўнлаб муҳожирлар иштирокидаги норозилик намойишини тарқатиш учун полиция шовқинли гранаталарни қўллади. Агентлик маълумотларига кўра, муҳожирлар ҳуқуқни муҳофаза қилиш органлари ходимларига тошлар отишган, чиқинди қутиларини ёқиб юборишган. Охир-оқибат полиция тартиб ўрнатишга муваффақ бўлган. 

Муҳожирлар лагери яқинидаги норозилик акцияси суриялик қочқинлар иштирокидаги ЙТҲдан кейин бошланган. Дастлабки маълумотларга кўра, ўтиб кетаётган автомобиль суриялик 35 ёшли аёл ва унинг 10 ёшли қизини босиб кетган, бундан ташқари яна бир бола жароҳат олган. Машина бошқарувида бўлган кекса ҳайдовчи қўлга олинган. 

Муҳожирлик инқирози бошланган вақтдан бери Греция орқали тахминан 1,5 миллион қочқин ва муҳожир Европага ўтган. Жорий йилнинг февралидан миграция "болқон йўли" ёпиб қўйилган ва бунинг натижасида 60 минг киши Грецияда блокланиб қолган.