WikiLeaks Jullian Assanjning interneti o‘chirilganini ma'lum qildi

Ekvadorning Londondagi elchixonasida qo‘nim topgan internet-platforma asoschisi Jullian Assanjni internetga chiqish imkonisiz qoldirishdi. Bu haqida WikiLeaks xabar berdi. 

"Jullian Assanjning internetga ulanish imkoni "muayyan" davlat tomonidan ataylab o‘chirib qo‘yildi. Biz kutilmagan vaziyatlarga muvofiq choralar ko‘rib qo‘yganmiz", - deyiladi WikiLeaks'ning Twitter'dagi sahifasida. 

WikiLeaks asoschisi 2012 yildan buyon Ekvadorning Londondagi elchixonasida qo‘nim topgan - o‘sha yili shved hukumati uni AQShga ekstraditsiya qilishidan qo‘rqib, u Ekvador hukumatiga siyosiy boshpana so‘rab murojaat qilgan.

Assanj Ekvador elchixonasiga kelgan vaqtdan buyon shved prokuraturasi biror marta gumondorni so‘roq qilmagan va shu bois idora Shvetsiyada ko‘p marta tanqidga uchragan. 

Manbaga ko‘ra, Stokgolm va Kito o‘rtasidagi bir necha oylik yozishmalardan so‘ng shved prokuraturasi 17 oktabrda Assanjni Londondagi Ekvador elchixonasida so‘roq qilishi mumkin.