Қозоғистон парламенти Мажилиси (қуйи палатаси) РФ билан Бойқўнғир мақоми бўйича мавжуд битимга ўзгартиш киритишга оид келишувни тасдиқлади, деб хабар қилмоқда РИА Новости агентлиги.

"Ушбу ҳужжатдан мақсад, Бойқўнғирга икки томонлама солиқ солиш масаласини ҳал этишдан иборат. Бугунги кунда Бойқўнғирдаги қозоқ тадбиркорларига  қўшимча қиймат солиғи солинади. Ўз навбатида, бойқўнғирлик (россиялик) солиқ тўловчилар бу ҚҚСни ҳисобга олишга ҳақли эмас ва шу боис маҳсулот нархи ўз-ўзидан кўтарилади. Айни чоғда, Россия солиқ кодексига биноан, 18 фоизлик ҚҚС ҳам тўланади", — деб қайд этган Қозоғистон молия вазири Бахит Султонов қуйи палата пленар мажлисида. 

Унинг сўзларига кўра, Қозоғистон ҳудудида Бойқўнғирдан келтирилган маҳсулотларни сотишда ҳам худди шундай ҳолатни кузатиш мумкин. Шу сабаб, сунъий равишда нарх кўтарилиши таъминланади. 

Янги ўзгартишлар эса, ҚҚСни биргина Бойқўнғирда олишни ва шу билан тадбиркорлар ва аҳолига қулайлик тақдим этишни кўзда тутади.